O PROGRAMA "LUZÍA DUESO" EN A WEB D'AS BIBLIOTECAS ESCOLARS D'ARAGÓN

L’Aragonés empecipió a impartir-se en os centros publicos d’Aragón en o curso academico 1997-1998. Ta part d’alavez yeran quatro es centros que aculliban esta iniciativa con una plaza de mayestro cada un: Chaca, Biescas, L'Ainsa y Benás. En l’anyada 2009 se i achuntó una atra plaza más ta o CRA Cinca-Cinqueta. Hue, os cinco mayestros achustaus per o Departamento de Educación, Universidad y Deporte d’o Gubierno d’Aragón, fan clases d’aragonés en 22 centros escolars.

Dende alavez, han pasau per as clases d’aragonés más de 3.000 alumnos.

En o curso 2005/2006, a iniciativa d’a persona responsable de luenga y literatura de o CPR de Huesca, s’empecipió a fer un Seminario ta profesorau d’aragonés, como espacio ta fer partache d’experiencias, millora d’a formación y actualización profesional ta o profesorau que feba aragonés y atros docents que i yeran interesaus. Amás feba honra ta replegar propuestas y poder intercambiar materials didacticos, recursos y metodolochía.

En o curso 2006/2007, y prenendo como modelo o programa Jesús Moncada, que feba actividatz socioculturals de dinamización de o catalán d’Aragón en os centros escolars de l’Aragón oriental an que se i feba esta asignatura, se posó en marcha un programa d’animación arredol d’a luenga e a cultura aragonesa, que dimpués prenió o nombre de “Luzía Dueso”, en honor a la escritora chistavina. Estió organizau per a Dirección Cheneral de Politica Educativa y coordinau per Mª Pilar Benítez dica o curso 2012/2013 que prene a coordinación Fernando Romanos.


Dende este curso se i fan qualques cambios: en primerías s’ixampla dica 60 actividatz a traviés d’una oferta ubierta y publica incorporando-ie as tematicas d’actualidat y nuevas tecnolochías, y a participación de todas as asociacions y editorials referencials en a promoción de l’aragonés. Dimpués se fa convocatoria ubierta a totz es centros sostenius con fondos publicos de tot Aragón, fendo que a difusión de l’aragonés s’ixample a un numero de centros más gran.

O programa s’estructura en cínco ambitos an que se i fican as actividatz: Nuevas tecnolochías, audiovisual, cine; Difusión d’o patrimonio lingüistico aragonés; Mosica, teatro, plastica; Cultura, actualidat, deporte y sociedat; Literatura y sciencias. Aquí se i troba una ixamabrada de quasi cuaranta actividatz como: Chugando y aprendendo con a wikipedia en aragonés, Hacer cine en aragonés con niños, Charrín Chugán: etnotextos, Teatro en aragonés, Literatura de autor en Aragón; Mosica en aragonés, Cuenta cuentos en aragonés y A tronca de navidat.

Amás d’estes ambitos se proponen actividatz de convivencia entre alumnau de os centros que imparten aragonés, actividatz d’asociacions y editorials, ta dar a conoixer o treballo que fan estas entidatz y as suyas publicacions y fomentar a lectura, vesitas d’autor, que cuenta con a participación d’escritors en aragonés que s’achuntan con a mainada ta parlastuquiar d’a suya obra literaria. Amás d’ixo es centros pueden proponer actividatz de centro que seigan d’o suyo interés y respondan a os obchectivos de o programa.

Gracias a este programa se mira de potenciar a difusión y dignificación de l’aragonés en l’espacio educativo, fendo posible que l’aragonés s’emplegue en totz es campos d’a cultura y a sciencia, reviscolando o suyo emplego, dando a conoixer a la chent que lo fa servir y fendo honra a o profesorau d’aragonés como ferramienta d’apoyo a las suyas clases.

Fernando Romanos Hernando
Asesoría del Programa “Luzia Dueso”
Promoción del aragonés en los centros educativos 

Fuente: www.catedu.es

No hay comentarios:

Publicar un comentario