Bastián Lasierra.

Toz tenemos en as bidas nuestras á personas que nos fan beyer a cosas dende atra embista. Parentalla, amigos, compañers que nos alportan lo que no se nos eba ocurriu y que no gosa ser o pensar cheneral.


Beyemos también ista birtú en bels personaches publicos que se colan atrabiés de os meyos de comunicazión en as casas nuestras y rematan fendo lo mesmo efeuto que quienes tenemos más amán.

Y á la fin, bi ha personas que tienen o poder de comunicar en cualsiquier puesto. En bibo y en direuto d’una radio, en un bar con os amigos u liderando una asoziazión cultural. Iste personache tiene dos nombres: Bastián Lasierra y El Marqués.

No ye l’unico, pero sí se combirtió en un icono en a dinnificazión de a lengua y cultura aragonesa. Si no por Bastián, encara no abrían saliu de l’almario cultural arrienda de aragoneses reibindicando a suya identidá. Si no por el, asaber-los cuántos de chobens sin referenzias culturals nuestras seguirían en a innoranzia cultural d’astí.

Estió Presidén de Ligallo de Fablans de Zaragoza una puenda chiqueta pero fundamental, que ebitó un cataclismo en una asoziazión feble en aquel inte.

Solo tenemos que palabras d’agradeximiento pa Bastián y pa la muller suya, Isabela, á qui li damos as nuestras memorias y pesames.

Pero El Marqués yera una miaja somarda y no podemos dixar la cosa tarcual. No podemos dizir que nos ha dixau y prau. Marcha, pero nos quedamos con os suyos podcast y o suyo blog.



  

Aupa, Marqués!

Chan Baos
Presidén de Ligallo de Fablans de Zaragoza

No hay comentarios:

Publicar un comentario