Presentazión de o informe de as grafías.


O pasau chuebes 16 de febrero, a Direzión Cheneral de Política Lingüística combocó á os coleutibos que treballamos por l’aragonés en a Biblioteca d’Aragón en Zaragoza. 

Astí, se nos amostró l’informe que redautón tres saputos trigaus y consensuaus por Consello d’a Fabla aragonesa, Estudio de Filología aragonesa y Sociedat Lingüística aragonesa, as tres asoziazions que han manteniu grafías á la par. L’asturiano Ramón d’Andres Díaz, o suizo Michael Metzeltin y o franzés Patrick Sauzet fuo os encargaus pa fer l’informe. 

O Gubierno d’Aragón enzetó un camín de caráuter conziliador entre as esferens embistas ortograficas con a intinzión de conseguir que toz sepamos escribir con una sola. Isto ye un trango bien importán pa la dinnificazión d’ista lengua. 

Anque o resultau no agrada de tot á dengún, ye platero que a dezisión que prenga o Gubierno d’Aragón no tendrá retacule, pa bien u pa mal. Dimpués d’atender á las seguras alegazions de as tres partis, se continará con a costituzión de l’academia y tot que amenista una lengua. 

Aquí se puede beyer o decumento presentau por d’Andrés en a biblioteca pa que pueda consultar-se. 

Ligallo de Fablans de Zaragoza, como parti autiba de o mobimiento por l’aragonés, aspera con pazenzia una soluzión que remate con a esferenzia de criterios arredol de a ortografía y confita que istos serán os primers días en que se beigan á las personas reblando en as suyas ideyas pensando en os benefizios d’una sola traza d’escribir. 

Profes que fa duelo dar o güebo salau, mesmo estando combenziu que tiens razón, pero cuan se negozia, todas as partis ganan. Ista oportunidá d’amostrar-nos chuntos ta la soziedá ye unica. Faigamos-la serbir con talento y ganaremos toz. 



Chan Baos, Presidén de Ligallo de Fablans de Zaragoza. 



No hay comentarios:

Publicar un comentario